Kreml nezareti altındaki Qırım Yuqarı mahkemesi Aqmescitli «Hizb ut-Tahrir işi» üç iştirakçisiniñ SİZOda tutulmasınen alâqalı appelâtsion şikâyetini red etti. Böyleliknen Ayder Saledinov, Teymur ve Uzeir Abdullayev avgustnıñ 10-na qadar apiste qalacaqlar. Bu aqta Qırım.Aqiqat muhbiri haber etmekte.
«Teymur mahkemege, SİZOda tutuluvınıñ 21-nci ayını onıñ diniy mensubiyeti, islâm dinini kütmesi ve ailesi yapılğan tazyıq olaraq qabul etkeni aqqında ayttı», – dep haber ete adliyeci Emil Kurbedinov.
Mahkeme oturışuvları qapalı rejimde keçti. Yalıñız qararlar ilân etilgen arada soy-soplarından ekişer kişi içerge kirsetildi. İşbu iş iştirakçileri olğan Emil Cemadenov ve Rustem İsmailovnıñ şikâyetleri iyünniñ 27-nde baqılacaq.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
