İyünniñ 26-nda Herson vilâyeti Geniçesk rayonında qırımtatar bayrağı Kününe bağışlanğan avtoyürüş ve vatanperverlik yürüşi keçti.
Qırım.Aqiqat muhbiri haber etkenine köre, qırımtatar bayraqlarını kötergen maşinalar Novoalekseyevka qasabasına kelip çıqqanından soñ, anda ukrain ve qırımtatar bayraqarı açıldı. Yürüş iştirakçileri qasabanıñ merkeziy soqağı boylâp keçti. Kolonnanıñ başında Arabat belinde yerleşken Sçastlivtseve köyünden kelgen meşur trampeteçiler yürdi. İnsanlar ellerinde ukrain ve qırımtatar bayraqlarnen yürdiler.
Yürüş daa soñra bayram kontserti, milliy Küreş boyunca numüneviy yarışkeçirilecek qasabanıñ Medeniyet evinde yekünlendi.
Aqşam Hersonda avtoyürüş yapılacaq.
Ukrainada qırımtatar bayraq Kününe bağışlanğan bir sıra tedbirlerniñ ötkerilmesi planlaştırıldı. Yürüş, miting ve avtoyürüşler Lviv, Odessa, Dnipro, Melitopol, Kyiv, Herson vilâyetinde ötkerilecek.
İyünniñ 26-nda qırımtatarlar Milliy bayraq Kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci qırımtatar halqı Qurultaynıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
