Ukraina prezidentiniñ qırımtatar halqı işleri boyunca vekâletlisi Mustafa Cemilev Ukraina vatandaşlarını qırımtatar bayrağı Kününen hayırladı. Bu aqta onıñ ictimaiy ağlardaki saifelerinde söz yürsetile.
« Qırımtatar bayrağı Künü hayırlı olsun!» – dep yaza Cemilev ukraince ve qırımtatarca.
Daa evel Ukraina prezidenti Petro Poroşenko vatandaşlarnı Qırımtatar bayrağı Kününen tebrikledi. O, «mavı-altın renkli qırımtatar bayrağı, Ukraina Devlet Bayrağınıñ mavı-sarı tüsü kibi, bugünki künde bizim serberstligimiz içün küreşimiz ve öz evimizde, ukrain Qırımında, bizim yerimizde tınç yaşav aqqınıñ belâğatlı timsali olıp qaldı» – dep qayd etti.
İyünniñ 26-nda qırımtatarlar Milliy bayraq Kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci qırımtatar halqı Qurultaynıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
