Link açıqlığı

Saatnıñ esas haberi

Qırımtatar milliy areketiniñ veteranı, faal Server Karametov iyünniñ 24-nde Eski Qırım şeer mezarlığında defin etildi. Bu aqta Qırım.Aqiqat muhbiri haber etmekte.

Faalnen vedalaşmaq içün bütün yarımdadadan qırımtatarlar keldi - umumen 1800ge yaqın insan bar.

Server Karametovnen vedalaşuv
Server Karametovnen vedalaşuv

«Halqımız içün bu pek büyük ğayıp. Bizler namuskâr ve cesür insannı coydıq. Ekseriyet içün o baba kibi edi. Epimizni öz fikrini aytmaqtan, narazılıq bildirmekten qorqmamağa ögrete edi», – dedi cenaze başında turaraq qırımtatar faali Nariman Celâl.

Mevzunen bağlı olaraq: Qırımtatar dissidenti Server Karametovnıñ ayatı ve küreşi (fotosuret galereyası)

Qırımtatar milliy areketiniñ veteranı, faal Server Karametov iyünniñ 23-nde Eski Qırımda olıp keçken yol qazasından soñ hastahanede vefat etti.

Qırımda faal öz halqınıñ vatanperver insanı olaraq tanıla edi ve esli-başlı em de bir qaç hastalığı olğanına baqmadan, o qırımtatarlarnıñ aqlarını qorçalamaq maqsadınen kütleviy tedbirlerde iştirak ete edi. 76 yaşındaki faal çeşit işlerde işçi olaraq çalışqan edi.

1944 senesi ailesi sürgün etilgen Özbekistanda o gaz hızmetinde müendis-mehanik olarq çalışa. Tuvğan Eski Qırımına avdet etken soñ – yerli kolhozda traktorçı ve çoban olaraq çalışa.

Qırımtatar faali Server Karametov 2017 senesi avgustnıñ 8-nde Aqmescitte qırımtatarlarnıñ liderlerinden biri olğan Ahtem Çiygozğa qol tutmaq maqsadınen keçirilgen bir kişilik piket sebebinden tutulğan edi.Oña qarşı eki dane memuriy protokol tüzüldi. Biri – «bir kişilik piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi.

Daa soñra Kreml nezareti altındaki Aqmescitniñ Jeleznodorojnıy rayon mahkemesi «politsiya hadimlerine qarşılıq köstergeni» içün Karametovğa 10 künlük memuriy tevqif cezası bergen edi.

XS
SM
MD
LG