Qırımtatar Milliy Meclisiniñ reisi Refat Çubarov qırımtatar milliy areketiniñ veteranı, faal Server Karametovnıñ vefatı sebebinden taziye bildirdi.
«Server ağa rusiyeli işğalcilerden qorqusı olmağanı, alçaqgöñülliligi ve namuskârlığından dolayı bütün qırımtatar halqınıñ ve başqa devletlerdeki bir çoq insanlarnıñ sevgi ve ürmetini qazanğan edi», – dep yaza Çubarov özüniñ Facebook saifesinde.
Onıñ sözlerine köre, Karametov defalarca ilhaq etilgen Qırımdan Kyivge kelerek, Qırımtatar Milliy Meclisinde ötkerilgen oturışuvlarda iştirak etip, çıqış yapqan.
«Qırımtatar halqınıñ milliy menfaatlarını qorçalav adına oña has israrlılıq ve uzlaşmayuvlığı er zaman onıñ subetdeşleri tarafından oña sayğı köstermesine sebep ola edi», – dep qayd ete Çubarov.
Çubarov Qırımtatar Milliy Meclisi adından «büyük ğayıbımız sebebinden onıñ soy-aqrabası ve yaqınlarına taziye bildire».
Mevzunen bağlı olaraq: Qırımtatar dissidenti Server Karametovnıñ ayatı ve küreşi (fotosuret galereyası)
Qırımtatar milliy areketiniñ veteranı, faal Server Karametov iyünniñ 23-nde Eski Qırımda olıp keçken yol qazasından soñ hastahanede vefat etti.
Qırımda faal öz halqınıñ vatanperver insanı olaraq tanıla edi ve esli-başlı em de bir qaç hastalığı olğanına baqmadan, o qırımtatarlarnıñ aqlarını qorçalamaq maqsadınen kütleviy tedbirlerde iştirak ete edi. 76 yaşındaki faal çeşit işlerde işçi olaraq çalışqan edi.
1944 senesi ailesi sürgün etilgen Özbekistanda o gaz hızmetinde müendis-mehanik olarq çalışa. Tuvğan Eski Qırımına avdet etken soñ – yerli kolhozda traktorçı ve çoban olaraq çalışa.
Qırımtatar faali Server Karametov 2017 senesi avgustnıñ 8-nde Aqmescitte qırımtatarlarnıñ liderlerinden biri olğan Ahtem Çiygozğa qol tutmaq maqsadınen keçirilgen bir kişilik piket sebebinden tutulğan edi.Oña qarşı eki dane memuriy protokol tüzüldi. Biri – «bir kişilik piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi.
Daa soñra Kreml nezareti altındaki Aqmescitniñ Jeleznodorojnıy rayon mahkemesi «politsiya hadimlerine qarşılıq köstergeni» içün Karametovğa 10 künlük memuriy tevqif cezası bergen edi.
