Ankarada Türkiye tış işleri naziri Mevlüt Çavuşoğlu Ukraina prezidentiniñ qırımtatar halqı işleri boyunca vekâletlisi Mustafa Cemilevnen körüşti. Bu aqta iyünniñ 7-nde nazir özüniñ Twitter saifesinde haber ete.
«Qırımtatarlarnıñ lideri Mustafa Cemilevnen yapqan körüşüvimizde, qırımtatarlarnıñ aqlı davasınıñ bütün dünyağa bildirilmesine yönelgen areketler ve bölgedeki soñki vaziyetnen bağlı fikir alışverişi yaptıq», – dep yaza Çavuşoğlu.
KHVnıñ malümatına köre, daa evel Cemilev ve Ukraina tış işleri naziri Pavlo Klimkin iştirak etken Ankara qırımtatar kültür ve yardımlaşma derneginde, Çavuşoğlu «Türkiye Qırım ilhaqını tanımağanı ve tanımaycağı» aqqında aytqan.
Daa evel Klimkin Twitterde Türkiye TİNniñ reberi Çavuşoğlu, Türkiyedeki qırımtatar teşkilâtlarınıñ temsilcileri ve iş adamlarınen meselelerniñ keniş yelpazesini, şu cumleden Rusiyedeki siyasiy mabüslerniñ azat etilüvi ve ilhaq etilgen Qırımda Qırımtatar Milliy Meclisiniñ aq-uquqlarınıñ tiklenüvini muzakere etecegi aqqında yazğan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
