Qırım Muhtar Cumhuriyeti ve Aqyar Milliy politsiya idaresi tarihiy abide – Bağçasaraydaki Han sarayınıñ «qanunsız şekilde ğayıp etilüvi, yıqıluvı ve bozıluvı» sebebinden cinaiy iş açtı. Bu aqta iyünniñ 7-nde politsiyanıñ matbuat hızmeti haber etmekte.
«Vaqtınca işğal etilgen Qırımda restavratsiya işleri yapılğanı kibi köstererek,Bağçasarayda XVI asırğa ait ve içine 19-dan ziyade bina kirgen yekâne mimariy ve dünyada tek sayılğan qırımtatar saray mimariyesiniñ abidesi olğan Han sarayı ğayıp etilmege devam ete. Onıñ aqiqiyligi ğayıp etile, tarihiy qıymeti mahv etile», – denilmekte haberde.
Politsiya cinaiy iş, Ukraina Cinayet kodeksiniñ 298 maddesi 1 qısmında belgilengen (Tarih ya da medeniyet abideleriniñ ğayıp etilüvi, yıqıluvı ve bozıluvı) alâmetlerine binaen açılğanı aqqında bildirmekte.
Bir kün evel rusiyeli adliyeci Nikolay Polozov, Moskvanıñ Koptevskiy rayon mahkemesine Han sarayı muzeyinde bütün «restavratsiya» işlerini yapqan tış icracığa qarşı şikâyet bergeni aqqında haber etken edi.
Qırımdaki Rusiye ukümeti Bağçasaraydaki Han sarayında «qazağa qarşı ilk nevbetteki işler»ni yapmağa devam ete.
Ukraina Medeniyet nazirligi, bu işlerniñ yapılması neticesinde Han sarayınıñ baş binası içün mahv etilmek telükesi bar, dep iddia ete.
Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımda olğan Geray hanlarına ait yazlıq rezidentiya yeri. Muzey kompleskiniñ territoriyasında saray, harem binası, han mezarlığı ve cami bulunalar. O, UNESCOnıñ Dünya mirası cedveline kirsetilmege namzettir.
