Ukraina Yuqarı Radasınıñ insan aqları boyunca vekâletlisi Lüdmila Denisova Rusiye prezidentiniñ mesleatçısı Mihail Fedotovtan, onıñ Rusiyede tevqif etilgen qırımtatar iş adamı Resül Velilâyevni ziyaret etmesini teşkil etkenini rica ete.
İyünniñ 6-nda ukrain ombudsmeniniñ saytı haber etkenine köre, Denisova ayrıca 12 yıllıq şiddetli apis cezasına mahküm etilgen ukrainalı jurnalist Roman Suşenkonen de körüşüv teşkil etilgenini rica ete.
İş adamları Velilâyev ve Ali Bariyev aprelniñ 26-nda Qarasuvbazarda Rusiye telükesizlik hadimleri Velilâyevge ait «Güzel» ticaret ağı ve «KrımOpt» şirketinniñ tükânlarını tintken soñ tutulğan edi.
Tintüvden soñ qırımtatar iş adamları Resul Velilâyev ve Ali Bariyev Qırımdan alıp ketildi.
Daa soñra, Velilâyev 2 ayğa tevqif etilerek, Moskvadaki Lefortovo taqiqat izolâtorına (SİZO) qapatıldı. Qırımda oña qarşı Rusiye Cinaiy kodeksiniñ 238-nci maddesiniñ 2-nci qısmına binaen («Telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi) boyunca iş açıldı.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
