AB ve ABD tarafından Rusiyege qarşı kirsetilgen sanktsiyalar, Ğarp olarnıñ semeresiz olğanını añlağan soñ lâğu etilir dep ayttı Rusiye prezidenti Vladimir Putin, iyünniñ 7-nde er yıl keçirgen «Canlı bağ» esnasında.
«Bu tazyıq, bizim ortaqlar, qullanğan usullar faydasız, semeresiz, er keske zarar bergenini añlağan soñ lâğu etilir. Rusiye Federatsiyasınıñ menfaatlarını esapqa almaq kerek olacaq», – dedi o.
Rusiye prezidenti Vladimir Putin iyünniñ 7-nde er yıl keçirilgen «Vladimir Putinnen canlı bağ»da çıqış yapacaq. Canlı bağğa soñki 10 yıl içinde ilk defa iç seyirci davet etilmedi. Matbuat hızmeti haber etkenine köre, bu hususan «diqqatni teleseyircilerniñ sualleri üzerine toplamaq» içün yapılğan. Rusiye prezidentine berilgen sualler studiya ekranına çıqarıla.
ABD prezidenti Donald Trump orta ve yaqın mesafege uçqan raketalarnen bağlı Muqavelen bozğanı içün öz ükümetine Rusiyege qarşı yañı sanktsiyalar planını azırlamağa avale etken edi. Buyruq mayısnıñ 16-nda Beyaz evniñ saytında derc etilgen edi.
Halqara teşkilâtlar Qırımnıñ istilâsını qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
