Eski Qırımda keçken tüntüvden soñ tutulıp alınğan onıñ sakini dağıstanlı Abdurahman Rustamov «İslâm devleti» terroristik teşkilâtınen bağlı olğanında qabaatlana bile. Bu aqta Qırım.Aqiqatqa tutulğan şahısnıñ qadınından alınğan malümatqa esaslanıp qırımlı adliyeci Mammet Mambetov ikâye etip berdi.
«Saba erte tintüv keçken maalde, ömür arqadaşı onıñ qocasına (Rustamovqa – QA) tintüvnen alâqalı oqulğan qararda, onıñ «İŞİD» (İGİL) terroristik teşkilâtına alâqası olğanı aqqında aytılğan edi. Bundan da ğyrı Rustamov qanunsız silâ saqlağanında qabaatlanır, çünki tintüv esnasında evinden granata tapılğan emiş. Rustamovnıñ özü dağıstanlı ve çoqtan berli Qırımda, daa evel coyulğan vesiqalarını tiklemeknen oğraşa eken», – dep ikâye etti adliyeci.
İyünniñ 6-nda saba Eski Qırımda telükesizlik hadimleri tintüv keçirgen soñ, bir erkek kişini tutulıp alınğan edi. Daa soñra belli olğanına köre, Kyiv rayon mahkemesi iyünniñ 7-nde oña nisbeten sıñırlav tedbiri tayin etilecek eken.
Rusiye telükesizlik hızmet muessiseleri bu hususnen bağlı izaat bermedi.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
