Kreml nezareti altındaki Aqmescitniñ Kyiv rayon mahkemesi iyünniñ 7-nde Eski Qırımda keçken tintüvden soñ tutulıp alınğan yerli sakin Abdurahman Rustamovqa nisbeten sıñırlav tedbiri tayin etmek niyetinde.
Bu aqta Qırım.Aqiqatqa tutulıp alınğan şahısnıñ ömür arqadaşından alınğan malümatqa esaslanğan qırımlı adliyeci Mammet Mambetov ikâye etip berdi.
«Aqşam (iyünniñ 6-nda Rustamov – QA) qadınına telefon açıp, yarın Kyiv rayon mahkemesi oña nisbeten sıñırlav tedbiri tayin etecegi aqqında haber etken. Yarın mahkeme qapalı keçeceginden asla şübem yoq. Rustamov qadınına, oña adliyeci tayin etilgeni aqqında da aytqan. Bu ise, telükesizlik hadimleri oña tazyıq yapıp, işbirlik yapmağa zorlağanı içün bir delil sayıla», – dep ikâye etti adliyeci.
Mambetov ayrıca, Rustamov ne yerde olğanına dair «ale daa bir malümat olmağanı» aqqında ayttı.
İyünniñ 6-nda saba Eski Qırımda telükesizlik hadimleri tintüv keçirgen soñ, bir erkek kişini tutulıp alınğan edi.Daa soñra belli olğanına köre, telükesizlik hadimleri tintüv esnasında iç bir türlü vesiqa köstermegenler.
Rusiye telükesizlik hızmet muessiseleri bu hususnen bağlı izaat bermedi.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
