Link açıqlığı

Saatnıñ esas haberi

Polozov Moskva mahkemesinden tış icracığa Han sarayınıñ «restavratsiyasını» yasaqlağanını rica ete


Nikolay Polozov
Nikolay Polozov

Rusiye adliyeci Nikolay Polozov, Moskvanıñ Koptevskiy rayon mahkemesine Han saray muzeyinde bütün «restavratsiya» işlerini yapqan tış icracığa nisbeten şikâyet bergeni aqqında haber etti. Bu aqta o iyünniñ 6-nda özüniñ Facebook saifesinde yaza.

«Bugün Elmira Ablâlimovanıñ avalesine binaen (Bağçasaray tarihiy-medeniy qoruğınıñ sabıq müdiresi – QA) men Moskvanıñ Koptevskiy rayon mahkemesine Han saray qoruğınıñ bütün «restavratsiya» işlerini yapqan tış icracı – OOO «Korporatsiya ATTA Grup»ğa nisbeten şikâyet berdim. Talaplar ep aynı – acele surette bütün «restavratsiya» işleriniñ toqtatıluvı, kompleksli ekspetiza keçirilüvi», – dep yaza Polozov.

Adliyeci daa evel kiralıq tış icracı – OOO «Kiramet»ke qarşı şikâyet bergenini, ancaq Qırım mahkemeleri şikâyetni qabul etmege ve şahsiy şikâyetni tatmin etmege red etkenini hatırlattı.

Polozovnıñ sözlerine köre, artık bu iş Halqara mahkemede baqılacaq, ayrıca basqa halqara muessiselerge de şikâyetler azırlanmaqta.

Qırımdaki Rusiye ukümeti Bağçasaraydaki Han sarayında «qazağa qarşı ilk nevbetteki işler»ni yapmağa devam ete. Ukraina Medeniyet nazirligi, Qırımdaki Rusiye ukümeti tarafından Bağçasaray qoruğınıñ territoriyasında işlerniñ yapılması neticesinde Han sarayınıñ baş binası içün mahv etilmek telükesi bar, dep iddia ete.

Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımda olğan Geray hanlarına ait yazlıq rezidentiya yeri. Muzey kompleskiniñ territoriyasında saray, harem binası, han mezarlığı ve cami bulunalar. O, UNESCOnıñ Dünya mirası cedveline kirsetilmege namzettir.

XS
SM
MD
LG