Aqmescitte Kreml nezareti altındaki Kyiv rayon mahkemesi Bağçasaraylı «Hizb ut-Tahrir işi» iştirakçileri Memet Belâlov, Marlen (Suleyman) Asanov, Ernes Ametov ve mayıs ayında tevqif etilgen Server Mustafayev ve Edem Smailovnıñ tevqif muddetini eki ayğa uzattı.
«Qırım birdemligi» cemaat birleşmesi haber etkenine köre, beş kişiniñ epsi avgustnıñ 9-na qadar SİZOda qalacaq.
Adliyecilerniñ sözlerine köre, mahkeme öz qararına «cinayetniñ ağır» olğanını sebep etip kösterdi.
Oktâbrniñ 12-sinde ilhaq etilgen Qırımda Rusiye telükesizlik hadimleri Bağçasaraynıñ altı sakini – Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı tutıp alğan edi. FSB olarnı Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
2018 senesi mayısnıñ 21-nde Qırımda «Qırım birdemligi»niñ koordinatorı Server Mustafayev ve qırımtatar, musulman Edem Smailov tutulıp alınğan edi. Olarnı qabaatlanuvı Bağçasaraylı «Hizb ut-Tahrir işi»ne qoşuldı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeliginde birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
