Eski Qırımda Rusiye küç idaresiniñ hadimleri tyerli sakinninevine tintüv maqsadınen kelip, iç bir vesiqa köstermeden onı tutıp alalar. Bu aqta iyünniñ 6-nda Qırım.Aqiqatqa ictimaiy uquqimayeci Mustafa Seydaliyev ikâye etip berdi.
«Tutulıp alınğa şahısnıñ adı ve soyadını bilgeme tırışamız. Tintüv keçken arada onıñ qadınını Kefe Rayon içki işler idaresine (Rİİİ) alıp ketip şaat sıfatında sorğulağanlar. Tintüv bitken soñ onı maşnağa yüklep alıp ketkenler. İdare hademleri onıñ evinden beş torba şey alıp ketken. İçinde neler olğanından haberimiz yoq. Ömür arqadaşı şok alda olğanı içün daa evni baqıp yetiştiralmağan. Küç idaresiniñ hadimleri alğan şeylerniñ cedevlini bersinler degenimni közardı ettiler. Ne telefon nomerası, ne yerge alıp ketkenleri, ne de protokol kopiyalarını qaldırmadılar. Sadece maşnağa oturtıp alıp kettiler. Ekstremizmde qabaatlana degen laflar yüre edi, ancaq biz qaysı madde olğanından bile haberimizyoq», – dep ikâye etti Seydaliyev.
Onıñ sözlerine köre, faaller onıñ ne yerde olğanını bilmege tırışalar.
Daa evel haber etilgenine köre, Eski Qırımda tintüv yapılğan yerge avtozak ketirilgen. Bu yerde OMON, TSE (Ekstremizge qarşı küreş merkezi), FSB kibi Rusiye telükesizlik hızmetleri bulunmaqta.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
