İyünniñ 6-nda Eski Qırımda tintüvden soñ tutulıp alınğan erkek kişi ekstremizmde qabaatlana. Bu aqta «Qırım birdemligi»niñ faalleri haber ete.
Tutulıp alınğan şahısnıñ qadını aytqanına köre tintüv saba saat 5-te başlanğan.
Şahısnıñ adı añılmay ve al-azırda ne yerde olğanı da belgisiz.
Qırım.Aqiqat bu meseleniñ inceliklerini ögrenmege tırışa.
Daa evel haber etilgenine köre, Eski Qırımda tintüv yapılğan yerge avtozak ketirilgen. Bu yerde OMON, TSE (Ekstremizge qarşı küreş merkezi), FSB kibi Rusiye telükesizlik hızmetleri bulunmaqta.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
