Kyivde Rusiye tarafından Qırımnıñ ilhaq etilgeni ve repressiyalar aqqında «Boz tüsteki zonanıñ» insanları» adlı kitapnıñ taqdimnamesi yapıldı.
Kitapnıñ muellifleri– qırımlı jurnalist, Qırım.Aqiqat muellifi Anna Andriyevskaya ve Ukraina mlliy hatıra institutınıñ mutehassısı Olena Halimon.
«Bu kitapta sizler Rusiye ordusı Qırımnı nasıl işğal etkeninen, insanlar, faaller nasıl munasebet köstergenlerinen bağlı tafsilâtlı malümat tapabilesiñiz. Bu 2014 senesi fevralnıñ 26-sı Qırımnıñ işğal etilüvini iç olmağanda bir kün keçiktirgen kündir. Ayrıca kitapta, Keriçte parom vastasınen insanlar kelerek, Rusiye timsalleri alıp yarımadada kezgenlerini, Qırımnıñ bahtlı sakini olğanın köstermege areket etkenlerini körmek mumkün. Muim bir bölük Qırımda yapılğan repressiyalarğa bağışlana. Eñ şiddetli qısım qıynavlarğa bağılşlana: XXI asırnıñ insanları işbu sovet maşnasınıñ bütün maiyetini öz başlarında keçireler.
Diger muellif Olena Halimonnıñ sözlerine köre, bu kitapqa şahsiy ikâyeler kirgen.
«Bu ikâyelerniñ epsi kerçek. Er bir insannıñ hususiy ikâyesi – pek ağırttırıcı, er kesniñ öz taqdiri bar. Bu kitapta yer alğan 57 şaat, dost ve qomşularıilhaqnı nasıl qabul etkeni aqqında yaza. Biz bu insanlarnıñ eyecan ve başlarından keçirgenleri bu kitapta aks olunğanını istedik. Biz olarnı iç taraftan köstermege areket etttik», – dedi o.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
