Rusiyeniñ Sankt-Peterburg şeerinde mahkeme, iyünniñ 2-nde ukrain bayrağınen beraber Rusiyede mahküm etilgen ukrain rejissörı Oleg Sentsovqa qol tutmaq maqsadınen mitingke çıqqan qırımtatar faali Asan Mumcı doquz künge tevqif etildi. Bu aqta «OVD-inform» haber ete.
«Mahkeme Mumcını izinsiz kütleviy tedbir teşkil etüvde qabaatlı dep tanıdı (Memuriy qanun Kodeksiniñ 20.2 maddesiniñ 2-nci qısmı). Faalge politsiya hadiminiñ qanuniy talabına uymağanı içün protokol tizilgeni (MQ Kodeksiniñ 19.3 maddesi) aqqında haber etilgen olsa da, soñradan bu tasdıqlanmadı», – denilmekte haberde.
Mumcınıñ tevqif etilgenini aqqındaki malümatnı Qırımtatar halqı Milliy Meclisiniñ reisi Refat Çubarov da tasdıqladı.
Mumcı, faller Olga Smirnova ve Mariya Kojevatovanen beraber ukraina bayrağı ve Oleg Sentsovnıñ qoltutuv plakatınen birlikte turğanlarında, iyünniñ 2-nde Petrograd mahkemesi yanında tutuldı. Mahkemede «Demokratik Peterburg» faali Vsevolod Nelayevniñ mahkeme oturışuvı ötkerilmek kerek eken.
Smirnovani politsiyadan protokol tizmeden qoyıp yibergenler. Kojevatova ve Mumcı gecelemege qaldırilğan. Daa soñra Kojevatova 15 künge tevqif etilgen ve o açlıq ilân etken eken.
Dünyanıñ br çoq develetinde iyünniñ 1 ve 2-nde, Rusiyeniñ Labıtnangi (Yamal-Nenets muhtar okrugı) şeeriniñ 8-nci koloniyasında açlıq ilân etken Qırımlı ukrain rejissörı Sentsovqa qol tutuv tedbirleri ötkerildi. İyünniñ 2-nde qadar, Sentsov artıq 20 künden berli açlıq tutmaqta.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen muddetsiz açlıq ilan etken edi.
Mayısnıñ 29-nda mahkümniñ adliyecisi açlıq tutqan Sentsovnıñ alı stabil ve o qoltutuv terapiyası alğanı aqqında haber etti.
Mayısnıñ 31-nde belli olğanına köre, Rusiyeniñ Kopeysk (Çelâbinsk vilâyeti) şeeriniñ koloniyasında yatqan Oleksandr Kolçenko, Oleg Sentsovnen birdemlik köstermek maqsadınen mayısnıñ 31-nden itibaren açlıq tutıp başlay.
Sentsov ve Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
