Kreml nezareti altındaki Aqmescitniñ Merkeziy rayon mahkemesi «26 fevral işi» boyunca ilân etilecek qararnı başqa künge avuştırdı, dep haber ete Qırım.Aqiqat muhbiri.
Oturışuv iyünniñ 13-ne avuştırıldı.
2015 senesi bir gruppa qırımtatar faallerine qarşı, 2014 senesi fevralniñ 26-sında Qırım Yuqarı Radasınıñ ögünde Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlatıldı. Olar kütleviy nizamsızlıqlarda iştirak etkenlerinde qabaatlandı.
Daa soñra mahkeme «26-nci fevral işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Qabaatlağan taraf Ali Asanov ve Mustafa Degermenci içün 3 yıl 6 ay muddetinen şartlı 5 yıl apis cezası, işbu işniñ diger iştirakçileri içün – aynı şartlar altında 3 yıl 6 aylıq apis cezası istedi.
2017 senesi oktâbrniñ 25-nde Rusiye akimiyeti Qırımda Qırımtatar Milliy Meclisi reisiniñ muavini Ahtem Çiygoz ve İlmi Umerovnı azat etip, Türkiyege yolladı. Daa soñra Umerov ve Çiygoz Kyivge keldiler.
