Ukrainalı siyasiy mabüslerler – ilhaq etilgen Qırım sakini rejissör Oleg Sentsov ve qırımlı anarhist Oleksandr Kolçenko anaları ilk defa körüşip, oğullarınıñ tez vaqıtta azat etilmesi içün yardım kösterilmesini rica eterek, Ukraina prezidenti Petro Poroşenkoğa muracaat ettiler.
Bu aqta Qırım.Aqiqat TV süjetinde söz yürsetile.
«Poroşenko efendi, sizge Rusiye apishanelerinde yatqan vatandaşlarıñıznıñ anaları muracaat ete. Yalvaramız, yardım etiñiz! Oğlum artıq eñ soñki tedbir olaraq – açlıq tutıp başladı. Albuki daa evel bunı yapmaycağını aytqan edi. Sizler olarnı bu apishanelerde taşlamazsıñız dep umüt etemiz», – dey rejissör Oleg Sentsovnıñ anası Lüdmila Sentsova.
«Ürmetli prezident efendi, sizge muracaat etem. Bizim oğullarımıznı azat etmek içün eliñizden kelgen er şeyni yapıñız. Olar ne prezdentten, ne de devletinden közü qaytmasın», – dey Oleksandr Kolçenkonıñ anası Larisa Kolçenko.
Bu
arada siyasiy mabüslerniñ anaları Rusiye prezidenti Vladimir Putinge muracaat etmediler.
«Saşa buña razı olmaz edi… Oleg de», – dep izaatlay qadınlarnıñ ekisi de.
Rusiyeniñ Kopeysk (Çelâbinsk vilâyeti) apishanesinde yatqan Qırım sakini olğan Oleksandr Kolçenko açlıq tutacağı aqqında mayısnıñ 31-nde ilân etken edi.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen muddetsiz açlıq ilan etken edi.
Ukrainalı rejissör Oleg Sentsov Rusiye apishanelerinde yatqan bütün ukrainalı siyasiy mabüslerniñ azat etilmesi talabınen muddetsiz açlığını devam ete. O, mayısnıñ 31-nde «onı deñiştirüv meraqlandırmağanı», çünki o «soñuna qadar baracaq insan olğanını» ilân etken edi.
Ukrainada ve bütün dünyadaki faaller Rusiye ve prezident Vladimir Putinden qanunsız tutulğan ukrainalılarnın azat etilmesini talap etmege devam eteler. Çeşit devlet ve qıtalarda #FreeOlegSentsov и #SaveOlegSentsov yazıları altında tedbirler ötkerile.
Sentsov ve Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
