İyünniñ 1-nde Bağçasaraydaki Han sarayında eki işçi yükseklikten yıqılğan. Bu aqta Qırımtatar Milliy Meclisi reisiniñ muavini İlmi Umerovnıñ qızı Ayşe, şaatlardan alğan malümatqa esaslanıp özüniñ Facebook saifesinde yaza.
Şaatlarniñ sözlerine köre, dep yaza Umerova, saraynıñ esas binası üzerinde yapılacaq demir çerçive montaj yapılğan arada, beş qatlı bina yüksekliginde olğan bu çerçive üzerinde eki kişi bar eken, ancaq olarnı tutqan sıcım qopqan ve çerçive üstündeki insanlarnen beraber havuz azbarına yıqılğan.
«Muzeyniñ memuriyeti zararlanğanlar aqqındaki malümatnı gizley. Şaatlarnıñ haberine köre, «acele yardım» maşnası tek bir kişini alıp ketken, reberiyet de zaten, başından berli bir kişi bar edi dep iddia ete. Ancaq vaqianı körgen şaatlar, yıqılğan maalde konstruktsiya üzerinde eki kişi olğanını iddia eteler. Vaqiadan soñ, muzeyniñ qapusı şu arada qapatılğan. Tahminlerge köre, bu ekince qurucının ölgenini gizlemek maqsadınen yapılğanıdır denilmekte», – dep yaza Ayşe Umerova.
Al-azırda işbu vaqianen bağlı ne Bağçasaray tarih-medeniyet muzey-qoruqığınıñ, ne Qırımdaki rusiye MÇS idaresi ve Qırımdaki Rusiye İİN idaresiniñsaytlarında ne tasdıq ne de inkâr yoqtır.
Aprelniñ 19-nda Bağçasaraynıñ «Han saray» kompleksiniñ kirişi ögünde yarımada tamır halqınıñ medeniy mirasını qorçalav adına eki dane bir kişilik piketler ötkerildi. Keçirilgen ilk bir kişilik piket iştirakçisi Edem Ablayev yanına rusiyeli politsiya hadimi kele. Bundan soñ bu tedbir yekünlene, onı «subet» keçirmek içün bir kenarğa çekeler. Daa soñra daa bir kişi elinde üzerinde «qırımtatarlarnıñ tarihını ğayıp etmege yeter» degen yazılı plakatnen çıqa.
Qırımnıñ rusiyeli akimiyeti Bağçasaraydaki Han sarayında «fevqulade vaziyetke ilk yardım» yapmağa devam ete. Ukraina Medeniyet nazirligi, bu işler keçirilgeni içün Han sarayınıñ esas binası yıqıluv telükesi altınnda olğanını iddia etmekte.
Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımda olğan Geray hanlarına ait yazlıq rezidentiya yeri. Muzey kompleskiniñ territoriyasında saray, harem binası, han mezarlığı ve cami bulunalar. O, UNESCOnıñ Dünya mirası cedveline kirsetilmege namzettir.
