Link açıqlığı

Saatnıñ esas haberi

«Rusiye tarafdarları yoq, provokatorlar bar». Qırımğa yaqın Geniçeskteki vaziyet aqqında


Geniçeskte ukrainalı faaller. Nümünelik fotosuret
Geniçeskte ukrainalı faaller. Nümünelik fotosuret

Ukraina prezidentiniñ Qırımdaki daimiy temsilcisi Boris Babin, Herson vilâyetiniñ Geniçesk rayonında Ukrainağa qarşı tedbirler ötkerile, vaziyetni qızıştırmağa areket eteler dep iddia ete. Qırımğa yaqın memuriy sıñırda neler ola? Rusiye propagandası ve Qırım memurları buña nasıl baqa? Ukraina bu hususta ne yapa? Bu ve başqa suallerge Qırım.Aqiqat Radiosınıñ musafirieri ve mutehassıslar cevap bere.

​Ukraina prezidentiniñ Qırımdaki daimiy temslcisi Boris Babin bu rayonda ukrain arbiyleriniñ arttırılmasına çağıra.

Çeşit türlü qanunsız zümreleşmeler qanunsız yolcu naqliyatınen oğraşa, mitingler ötkere, ükümetke siyasiy talaplar qoyalar
Boris Babin

– Vaziyet pek mürekkep. Çeşit türlü qanunsız zümreleşmeler qanunsız yolcu naqliyatınen oğraşa, mitingler ötkere, ükümetke siyasiy talaplar qoyalar. Diger«kriminalğa yaqın» zümreleşmeler aqqında asla da aytıp oturmayım. Problema şunda ki, tecavuzcı-devlet yerli akimiyetniñ zayıf olğanını köstermek maqsadınen bunı, vaziyetni kerginleştirmek içün qullana. O yerde kerçekten de kadrlar ve teşkiliy problemalar mevcut. Lâkin yaqın vaqıtta bütün problemalar çezileceginden eminmiz. Men ilk künlerden başlap Qırım ve Aqyar Milliy politsiya bölüginiñ quvetlendirilgenini istegen edim ve şimdi olar bütün sıñır noqtalarında em de hususan Geniçeskke de yerleştiler. Biz israrnen Milliy gvardiyanıñ bütün bölükleri yerleştirilgenini rica etemiz. MVD yolbaşçıları tarafından bu teklif tolusınen qabul etilmedi.

Boris Babin Geniçesk şeerini deñiz qaravulı ve Ukraina Arbiy Deñiz Quvetleri yerleşken bir şeer yapmaqnı teklif ete. Onıñ fikrine köre, Azav deñizinde bir kerginlik olğan vaqıtta bu tedbirler pek büyük emiyet qazana.

Hersonlı faal ve «Most» internet-neşiriniñ muarriri Sergey Nikitenko umumen alğanda prezidentniñ Qırımdaki daimiy temsilcisiniñ degerlendirüvinen razı.

– İcra akimiyeti sıñırdaş Geniçesk rayonınıñ problemalarından uzaqlaşqan alda. Men degerlendirüvlerimde muqayıt olam, amma Geniçesk rayon memuriyetiniñ reberi (Oleksandr Vorobyov QA) iç bir şey yapmağanı çette tursın, yapmaması bir cinayet, zaten. Onıñ anda qalmağa devam etkeni, icra akimiyetiniñ, hususan valiniñ bir cinayeti sayıla. Kerçekten de, özara küreş alıp bararaq kerginlik yaratqan bir qaç dane kriminal zümreleşme bar. Yaqın vaqıtta bizler anda seyahatçılar yani Rusiye tarafdarları barıp, çeşit sebepler altında ortalıqnı «qarıştırmağa» areket etkenini körgen edik. De balıqçılarğa, de taksicilerge qol tutqan ediler. Belli ki, bunıñ epsi, meselâ, Qırımğa yapılğan naqliyat kibi umumiy qabarcılıq üzerine bir ilâve ola. Bizim cevapsız qalğan bir sürü meselemiz bar.

Oleksandr Vorobyov
Oleksandr Vorobyov

Herson viâyet şurasınıñ deputatı, fevqulâde vaziyetler ve mudafaa boyunca vilâyet şurası reberiniñ mesleatçısı Mıkola Stavitskiy bu areketsizlikte ukrain devlet mahsus hızmetlerini öpkeley.

Aslında sıñırda yerleşken regionda devlet alâ daa SBU yolbaşçısını tayin etmedi. Bu bir nonsens ve devletniñ zayıf olğanınıñ köstergiçi
Mıkola Stavitskiy

– İlk-evelâ, menimce, Herson vilâyetindeki Ukraina telükesizlik hızmeti pek zayıf çalışa. Mesele anda çalışqan hadimler zayıf olğanında degil de, aslında sıñırda yerleşken regionda devlet alâ daa SBU yolbaşçısını tayin etmegenindedir. Bu bir nonsens ve devletniñ zayıf oğanınıñ köstergiçidir. Ayrı bir Rusiye tarafdarı olğan şahıslar bunı körgen soñ, vaziyetni kerginleştirmege baqa, vilâyet yolbaşçılarınıñ istifağa yollamağa, ne yerde ise, «Herson halq cumhuriyeti» qurmağa çağıralar. Bu cinayetçi gruppalarnı bugün esasen faaller, ictimaiy vatanperver teşkilâtları ve ATO iştirakçileri bastırıp, cayılmasını toqtata. SBU daa da faal çalışmaq kerek, çünki insanlar bunı kerçekten de beklep otura. Mında Rusiye tarafdarları yoq, lâkin provokatorlar bar.

Yaqınşarq tedqiqatlar Merkezi müdiriniñ muavini Sergey Danilov yaqın vaqıtta Herson vilâyetiniñ Qırım memuriy sıñırı civarında yerleşken meskün yerlerde ötkerilgen ictimaiy araştırmalar aqqında ikâye ete.

– Er yerde vaziyet bir degil, vaziyet qarışıq. Herson vilâyetiniñ bütün cenübinde, hususan Geniçesk rayonında özüni etnik ve siyasiy ceetten ukrainalı dep qabul etken vatandaşalrnıñ sayısı bayağı arttı. Bu regionda qatiyen küçlü Rusiye tarafdarları mevcut dep iddia etilmez.

(Metinni Vladislav Lentsev azırldı)

XS
SM
MD
LG