Qırımtatarlarnıñ işleri boyunca Ukraina prezidentiniñ vekâletlisi, Ukraina halq deputatı Mustafa Cemilev Californiyanıñ Stanford universitetinde çıqış yaparaq, Qırım aqqında lektsiya oquycaq. Bu aqta Cemilevniñ Facebook resmiy saifesi haber ete.
«Bugün aqşam kence Leland Stanford adını taşığan, daa ziyade Stanfordolaraq belli olğan universitette lektsiya oquycam. Bir kün evel ise, Stanford universitetine bağlı demokratiya, inkişaf ve qanun üstünligi meseleleri Merkeziniñ siyasiy ilimler professorı Michael McFaulnen tanışıp qonuşmağa fırsatım oldı», – denilmekte haberde.
«Еvromaydan SOS» cemaat teşkilâtınıñ koordinatorı Oleksandra Matveyçuk haber etkenine köre, Cemilevniñ lektsiyası – «Stanfordta Ukraina studiyası» tsikl çerçivesinde yapılğan ilk körüşüvdir.
«Keçken sene de men Ğarpnıñ ilmiy dairelerinde Ukrainadaki vaqialar Rusiye prizması üzerinden baqıla dep yazğan edim. Sunıñ içün bu vaziyetni biraz tüzetmek istedim. İşte, böyleliknen ortaq areketlernen bizler daa evel tasdıqlanğan tsikl boyunca ilk seminarnı teşkli etemiz. Ve Stanfordta ukrain seminarlarınıñ birincisini qırımtatar halqınıñ lideri Mustafa Cemilev açacaq», – dep yaza faal.
Daa evel Washingtonda Mustafa Cemilev demokratiyağa qoltutuv Milliy fondı tarafından (NED) demokratiyağa hızmet etkeni içün medalnen taqdirlengeni aqqında haber etilgen edi.
Qırımtatar halqınıñ lideri, Ukraina halq deputatı Mustafa Cemilev ABDni ziyaret etken vaqıtta ilhaq etilgen Qırımda insan aqları bozulğanını muzakere etmek içün Beyaz ev temsilcileri, kongressmen ve senatorlarnen körüşmekni planlaştırğan edi.
