İtibarlı halqara teşkilât teklif etken taqdirde Kyiv, rusiyeli jurnalist Arkadiy Babçenkonıñ öldürilüvinen alâqalı taqiqat keçirilüvinde halqara yardım almaqnı qabul eter. Bu aqta mayısnıñ 29-nda Ukraina tış işleri naziri Pavlo Klimkin, BMT ştab-kvartirasında Havsızlıq Şurasınıñ oturışuvı bitken soñ, jurnalistlerniñ suallerine cevap bergen vaqıtta haber etti.
«Netice almaq, bunı taqiq etmek, bunıñ artında kimler turğanını tapmaqnen bağlı er türlü kerçek yardım – minnetdarlıq ile qarşılanacaq. Kerek olğan bütün meseleler boyunca kösterilgen yardımğa sıcaq baqarmız. Eger bu işançlı halqara teşkilât adından yağılacaq olsa, elbette qabul etermiz», – dep ayttı Klimkin.
Rusiyeli muhalefetçi jurnalist Arkadiy Babçenko mayısnıñ 29-nda aqşam Kyivde öldürildi. Bu vaqia o tükândan qaytqan arada kvartirasına kireyatqanında olğan. Sırtından yaralanğan Babçenko «acele yardım» maşnasında vefat etti.
Ukraina uquqorçalav organları «qastlı öldürilüv» maddesi boyunca cinaiy iş açtı. Politsiya qatil fotorobotını aşkâr etti.
Ayrıca şunı oquñız: Arkadiy Babçenko: «İnfantilizm Rusiyeniñ milliy ğayesine çevirildi»
Babçenko Rusiyeni 2017 senesi fevral ayında terk ete. O, öz qararını oña qarşı cinaiy iş açılma ihtimali bar dep izah ete.
Bundan bir qaç ay evelsi, 2016 dekabr ayında, o TU-154 uçağında, öz arbiylerini Suriyege Yañı yılnen hayırlamağa ketken Rusiye arbiyleri, jurnalistleri ve Aleksandrov adına ansambl artistleri uçaq qazasından ölgenlerine iç acınmağanını bildirgen edi. Bundan soñ Rusiyede Babçenkonı vatandaşlıqtan marum etmek içün imzalar toplanıp başlandı.
Soñki zamanlarda jurnalist Kyivde qırımtatar ATR telekanalında çalışqan edi.
