Link açıqlığı

Saatnıñ esas haberi

Rusiye tış işleri naziri Sergey Lavrov Moskvanıñ Kyivde öldürilgen rusiyeli muhalefetçi jurnalist Arkadiy Babçenkonıñ ölümine alâqası olğanını inkâr ete. Rusiyeniñ TASS informatsion agentligi haber etkenine köre, mayısnıñ 30-nda Lavrov bu şekilde yapılğan beyanatlar Rusiyege qarşı yürsetilgen kampaniyalarnıñ bir parçası olğanını ayttı.

Babçenkonıñ öldürilüvine Rusiye alâqadar olması mumkün olacağı aqqında Facebookta Ukraina baş naziri Volodımır Groysman yazğan edi. Jurnalistniñ ölüminden soñ pek çoq vaqıt keçmeden Groysman «Rusiye totalitar maşnası» Babçenkonıñ namuslılığı ve prinsipialligini bağışlap olamağından emin olğanını bildirdi.

«Ukraina baş naziri artıq bunı Rusiye mahsus hızmetleri yaptı dep ayta. Halqara işlerni bu şekilde yürsetüv modası – pek kederli», – dedi Lavrov.

Rusiyeli muhalefetçi jurnalist Arkadiy Babçenko mayısnıñ 29-nda aqşam Kyivde öldürildi. Bu vaqia o tükândan qaytqan arada kvartirasına kireyatqanında olğan. Sırtından yaralanğan Babçenko «acele yardım» maşnasında vefat etti.

Ukraina uquqorçalav organları «qastlı öldürilüv» maddesi boyunca cinaiy iş açtı. Politsiya qatil fotorobotını aşkâr etti.

Ayrıca şunı oquñız: Arkadiy Babçenko: «İnfantilizm Rusiyeniñ milliy ğayesine çevirildi»

Babçenko Rusiyeni 2017 senesi fevral ayında terk ete. O, öz qararını oña qarşı cinaiy iş açılma ihtimali bar dep izah ete.

Bundan bir qaç ay evelsi, 2016 dekabr ayında, o TU-154 uçağında, öz arbiylerini Suriyege Yañı yılnen hayırlamağa ketken Rusiye arbiyleri, jurnalistleri ve Aleksandrov adına ansambl artistleri uçaq qazasından ölgenlerine iç acınmağanını bildirgen edi. Bundan soñ Rusiyede Babçenkonı vatandaşlıqtan marum etmek içün imzalar toplanıp başlandı.

Soñki zamanlarda jurnalist Kyivde qırımtatar ATR telekanalında çalışa edi.

XS
SM
MD
LG