Avropada havsızlıq ve işbirlik teşkilâtı belli rusiyeli jurnalist Arkadiy Baçenkonıñ öldürilüvini takbih etti.
«Men bu deşet areketten çorlandım. Men ükümetni bu öldürüvnen bağlı vaziyetni tezce ögrenip mesuliyetli şahıslarnı ve bu buyruqnı bergenlerni cevapkârlıqqa çekmesini isteyim», – dep bildire OSCE saytı teşkilâtnıñ kütleviy haber vastalarınıñ serbestligi boyunca temsilcisi Arlem Deziranıñ sözlerini.
O, Babçenkonıñ ailesi, dostları ve zenaatdaşlarına taziye bildirdi.
Rusiyeli muhalefetçi jurnalist Arkadiy Babçenko mayısnıñ 29-nda aqşam Kyivde öldürildi. Bu vaqia o tükândan qaytqan arada kvartirasına kireyatqanında olğan. Sırtından yaralanğan Babçenko «acele yardım» maşnasında vefat etti.
Ukraina uquqorçalav organları «qastlı öldürilüv» maddesi boyunca cinaiy iş açtı. Politsiya qatil fotorobotını aşkâr etti.
Ayrıca şunı oquñız: Arkadiy Babçenko: «İnfantilizm Rusiyeniñ milliy ğayesine çevirildi»
Babçenko Rusiyeni 2017 senesi fevral ayında terk ete. O, öz qararını oña qarşı cinaiy iş açılma ihtimali bar dep izah ete.
Bundan bir qaç ay evelsi, 2016 dekabr ayında, o TU-154 uçağında, öz arbiylerini Suriyege Yañı yılnen hayırlamağa ketken Rusiye arbiyleri, jurnalistleri ve Aleksandrov adına ansambl artistleri uçaq qazasından ölgenlerine iç acınmağanını bildirgen edi. Bundan soñ Rusiyede Babçenkonı vatandaşlıqtan marum etmek içün imzalar toplanıp başlandı.
Soñki zamanlarda jurnalist Kyivde qırımtatar ATR telekanalında çalışa edi.
