Rusiye Taqiqat komiteti Kyivde rusiyeli muhalefetçi jurnalist Arkadiy Babçenkonıñ öldürilüvi sebebinden cinaiy iş açtı, dep haber ete Azatlıq Radiosı.
Rusiye TİN Ukraina ükümetini «taqiqat tezce yapılması içün bütün imkânlarnı qullanmasına» çağırdı.
«Bu devlette KHV hadimleriniñ öldürilüvi, olarnı çekiştirüv seviyesi barğan sayın artmaqta, taqiqat neticesi ise, cenayetçilerniñ cezalanmasına ketirmey. Qanlı cinayetler ve asla cezalanmayüv Kyiv rejimi içün muntazam olıp qaldı», – dep ayıla Rusiye TİNnde.
Rusiye jurnalistler birligi de jurnalistniñ öldürilüvine nisbeten öz munasebetini bildirdi.
«Rusiye jurnalistler birligi arbiy jurnalist Arkadiy Babçenkonıñ öldürilüvi sebebinden çorlandı. Şimdiki zamanda jurnalisteler öz vazifesini eda eter eken öldürilgenine çoq yazıqsınamız. Jurnalistniñ milleti ve noqta-i nazarı muim degil. Olar- jurnalist. Olar malümat toplay. Olarnı bunıñ içün öldürmege olmay», – dep qayd ete Birlikniñ kâtibi Yuliya Zagitova.
Daa evel Kyiv politsiyası rusiyeli jurnaist Arkadiy Babçenko Kyivde elâk olğanı aqqında haber etken edi.
Ukraina uquqorçalav organları «qastlı öldürilüv» maddesi boyunca cinaiy açtı. Politsiyanıñ malümatına köre, Babçenkoğa bir qaç sefer qurşun atılğan.
Babçenko Rusiyeni 2017 senesi fevral ayında terk ete. O, öz qararını oña qarşı cinaiy iş açılma ihtimali bar dep izah ete.
Bundan bir qaç ay evelsi, 2016 dekabr ayında, o TU-154 uçağında, öz arbiylerini Suriyege Yañı yılnen hayırlamağa ketken Rusiye arbiyleri, jurnalistleri ve Aleksandrov adına ansambl artistleri uçaq qazasından ölgenlerine iç acınmağanını bildirgen edi. Bundan soñ Rusiyede Babçenkonı vatandaşlıqtan marum etmek içün imzalar toplanıp başlandı.
Soñki zamanlarda jurnalist Kyivde qırımtatar ATR telekanalında çalışa edi.
