Ukrainanıñ qıta qısmındaki universitetler esasında qısqartılğan şekilge köre oquvğa kirmek içün açılğan «Qırım – Ukraina» tasil merkezlerinde iyünniñ 1-nde abituriyentler içün açıq qapu künleri ötkerilecek. Bu aqta Qırım.Aqiqat Radiosınıñ «Kündüz şou»sı efirinde Ukrainanıñ vaqtınca işğal etilgen territorialar mesleleri boyunca nazir muavini Yusuf Kürkçi ikâye etip berdi.
«Bugünki künde qıta qısmında işğal etilgen territoriyalardan kelgen 10 biñge yaqın talebe oqumaqta. Bu talebeler evlerini ziyaret etmek ve ana-babalarını körmek içün bütün memuriy sıñırlarnı raaatlıqnen kesip keçeler. Olar devamlı migratsiya alında, yılda 3-4 kere olar ille ki memuriy sıñırlarnı kesip keçeler. Bu balalar bir kere de olsun problema körmediler. Lâkin musnet tarafı şu ki, bu diplomlar bütün dünyada tanıla ve biz işğal etilgen territoriyalar aqqında aytacaq olsaq, belli ki, bu diplomlar pek şubeli sayılacaq», – dey Kürkçi.
Mevzu boyunca: «Qırım diplomı – bir kâğıt»: yarımadadan kelgen abituriyentler Ukraina qıta qısmındaki aliy oquv yurtlarına nasıl etip oqumağa kirmeli
Ukraina Tasil ve ilim nazirliginiñ malümatına köre, hususan Qırım sakinleriniñ Ukraina aliy oquv yurtlarına qısqartılğan yolnen – yani VNO keçmeden kirmesi içün – 35 dane «Qırım – Ukraina» tasil merkezi çalışacaq.
Ukraina Tasil ve ilim nazirligi daa evel qayd etkeni kibi, vaqtınca işğal etilgen Donbass ve Qırımda berilgen diplom ve tasilnen alâqalı diger vesiqalar Ukrainada ve dünyanıñ başqa devletlerinde uquqiy olaraq tanılmamaqta.
