Qırım MC prokuraturası Qırımda ukrain vatandaşlarınen alâqalı qanunsız tutuluv ve tintüvler boyunca 250 dane vaqianen bağlı 140 dane cinaiy iş açtı, dep bildirdi mayısnıñ 29-nda Kyivde, Qırım MC prokuraturası taqiqatçılarnıñ cinaiy taqiqatlar boyunca protsesual işler bölüginiñ reberi İgor Ponoçovnıy.
Onıñ sözlerine köre, yaqında biñzer işler Server Mustafayev ve Edem Smailovnıñ tutuluvı boyunca açıldı ve olar Ukraina Cinayet kodeksiniñ 146 maddesi 2 qısmına köre hasiyetlene (qanunsız şekilde azatlıqtan marun etüv, qanunsız şekilde meskenge kirüv).
«Qırım MC prokuraturası Rusiye akimiyeti ve telükesizlik organları Qırımda yapğan bütün qanunsız areketlerine qarşılıq köstere. Şahsen şaatlardan malümat almağa çare olmağanda taqiqat keçirmek pek qıyın. Sunıñ içün zarar körgen şahıslarnıñ temsilcisi olğan uquqimaye teşkilâtlarınen işbirlik yapmaq pek muim», – dedi Ponoçovnıy.
O, er bir taqip ve qanunsız areket «munasip cinaiy işlernen tasdıqlana» ve al-azırda ğıyaben haberdar etilgen 18 şubeli şahıs bar dey. KHV ve ictimaiy ağlar vastasınen bu şahıslar devamlı tesbit etile, dep qayd ete Ponoçovnıy. Söz, tintüv keçirgen ve insanlarnı tutqan telükesizlik organlarnıñ hadimleri, tevqifnen alâqalı qarar çıqarğan mahkemeciler aqqında kete.
«Qırım MC prokuraturası, Milliy politsiya, Qırım MC SBU organları çalışa, lâkin qanun bozulğan bu territoriyalarğa şahsen kirmege imkânımız olmağanı sebebinden bazı qıyıncılıqlar peyda ola», – dey Qırım MC prokuraturası temsilcisi.
«Qırım birdemligi»niñ faali Server Mustafayev mayısnıñ 21-nde FSB hadimleri tarafından Bağçasarayda tutulğan edi. Onen beraber 15 yıl devamında Bağçasarayda diniy merasimler ötkergen Bağçasaray rayonı Topçıköy (Dolinnoye) köyüniñ sakini Edem Smailov da tutulup tevqif etilgen edi.
Ekisi de Rusiyede yasaqlanğan «Hizb ut-Tahrir» musulman teşkilâtınenalâqaları olğanında şeklene.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
