İlhaq etilgen Qırımnıñ gece saatlarında yarıqlandıruv seviyesi 2012 senesinen muqayese etilgende 2016 senesi 26% tüşti, dep haber ete vaqtınca işğal etilgen territoriyalar meseleleri ve köçken insanlar nazirligi.
Ukrain nazirliginiñ malümatına köre, bu yarımadadaki iqtisadiy kerilüvniñ köstergiçi olabile.
«Bölgeniñ iqtisadiy vaziyetini dolaylı yolnen degerlendirüv usullarından biri, suniy yoldaştan çekilgen resimlerni talil eterek, bölgedeki yarıqlandıruv seviyesini ölçemektir», – dep qayd eteler nazirlikte.
Talil etmek içün NASA Eart Observatoryde yerleşken Suomi-NPP (ABD) suniy yoldaştan alınğan malümatlar qullanılğandır.
Mevzu boyunca: Qırım iqtisaadiyatı: ne millionlar, ne de yatırımcılar
Kreml nezareti altındaki Qırımnıñ yolbaşçısı Sergey Aksönov, 2017 senesi Qırım ükümetiniñ faaliyeti boyunca esabat berir eken, Qırımda iqtisadiyat yükselişi 10%ni teşkel etkenini ayttı.
Bunen beraber Aksönov, iqtisadiyat saasında Qırım sakinleriniñ ortalama aylığı ve tarifler siyaseti kibi bir sıra problemli meseleler oğanını qayd etti.
Rusiye tarafından tayin etilgen Qırım Maliye nazirligi daa evel, 2018 senesi yanvar-fevral aylârında bücetke yollanılğan para miqdarı 4,9 mlrd ruslege eksilgeni ya da keçken 2017 senesiniñ aynı aylârına nisbeten54,1% daa az olğanını qayd etken edi.
