Ukraina tış işleri nazirligi jurnalist Roman Suşenkoğa qarşı açılğan iş siyasiy sebeplernen bağlı dep saya ve tez vaqıtta onıñ azat etilmesini talap ete. Bu aqta TİNniñ matbuat kâtibi Maryana Betsa Twitterde yazmaqta.
«Bir daa işniñ siyasiy sebeplernen bağlı olğanını qayd etip, Rusiye tecvuzınıñ esiri olğan jurnalist Suşenkonıñazat etilmesini talap etemiz», – dep qayd ete o.
Daa evel adliyeci Mark Feygin Rusiye prokuraturası ukrainalı jurnalist Roman Suşenkonıñ 14 yılğa azatlıqtan marum etilgenini istegeni aqqında haber etken edi.
FSB sentâbrniñ 30-nda Moskvada ukrain jurnalisti, «Ukrinform» agentliginiñ muhbiri Roman Suşenkonı, ukrain istihbaratınıñ hadimi dep, «bir maqsatqa baqtırılğan ve devlet sırı dep sayılğan, silâlı quvetler ve Rusiye milliy gvardiyası aqqında malümat toplağanında» qabaatlayaraq, tutıp alğan edi. Jurnalistke nisbeten «casuslıq» maddesi boyunca cinaiy iş açılğan edi.
Bu yıl martnıñ 27-nde iş baqılıp başlandı ve oturışuvlar qapalı şekilde ötkerile.
SBUnıñ malümatına köre, Rusiye ve işğal etilgen Qırımda onlarnen ukrainalı tutulmaqta. Uquimayecilerniñ malümatına binaen, siyasiy sebeplerden dolayı parmaqlıqlar artında bulunğanlar arasında Oleg Sentsov, Oleksandr Kolçenko, Mıkola Karpük, Stanislav Klıh, Roman Suşenko, Yevgeniy Panov ve digerleri bar.Mabüsler arasında – ressamlar, jurnalistyler, cemaat erbapları, qırımtatar faalleri bar.
