Bağçasaraylı «Hizb ut-Tahrir işi» iştirakçileri Remzi Memetov, Enver Mamutov, Zevri Abseitov ve Rustem Abiltarovnıñ Rusiyeniñ Rosto-na-Donu şeerine alıp ketilüvi, Ukraina ve halqara qanunlarnı boza.Mayısnıñ 24-nde Qırım.Aqiqatqa bu aqta Qırım MC prokuratırasınıñ temsilcisi ayttı.
«Mabüslerniñ vaqtınca işğal etilgen Qırım yarımadasından Rusiyege alıp ketilüvi milliy ve halqara gumanitar aq-uquq normalarını boza», – dedi Qırım MC prokuraturasınıñ prokurorı Yelizaveta Dzigora.
Prokuraturada ayrıca, bu kibi areketlerge Ukraina Cinayet Kodeksiniñ 438-nci maddesine binaen cenk ve cenk qaideleri bozulğan allar boyunca açılğan cinayet işi çerçivesinde taqiqat kontekstinde uquqiy qıymet kesilecegini de qayd etti.
Mayısnıñ 22-nde Bağçasaraylı «Hizb ut-Tahrir işi» iştirakçilerini Aqmescit taqiqat izolâtorından Rusiyeniñ Rostov-na-Donu şeerine alıp kettiler.
2016 senesi mayıs 12-de Bağçasarayda Rusiye telükesizlik hadimleri musulmanlar, qırımtatarlarnıñ evlerini ve yerli qavehaneni tinttiler. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov tevqif etilerek, terrorizmde qabaatlandı. Olar Rusiyede terroristik dep tanılğan «Hizb ut-Tahrir» teşkilâtında iştirak etüvde şeklene.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.Halqara uquq işğal etilgen territoriyalarda işğalci devlet qanunlarınıñ kirsetilmesini yasaqlay.
