Ukraina ilhaq etilgen Qırımda Rusiye qanunlarına köre qayd etilgen işhanelerge nisbeten kirsetilgen sanktsiyalarnı üç yılğa uzattı.
Sanktsiyalar kirsetilgen işhanelernñ cedveli Ukraina prezidentiniñ saytında derc etildi.
Vesiqada hususan, «Massandra» ziraat-istisal birleşmesi, «Novıy Svet» şampanya zavodı, Aqmescit şapap zavodı, Qırım şarap zavodı (sabıq «Pervomayskiy»),«Pribrejnaya» agrosanayı şirketi, «Vinogradnıy» agrokombinatı, Qırım balıq asrav yeri, «Massandra»nıñ filialları ve başqa işhanelerniñ adı keçe.
Söz aktivlerniñ blok etilüvi, ticariy işlernin sıñırlanuvı, iqtisadiy ve maliyeviy mecburiyetleriniñ toqtatıluvı, litsenziyalarnıñ lâğu etilüvi ya da toqtatıluvı, em de diger sıñırlav tedbirleri aqqında kete.
Umumen sanktsion cedvelge 1748 şahıs ve 756 işhane kirmekte. Bir yıl evelsi sanktsiyalar cedveline 1228 şahıs ve 468 dane şirket kirsetilgen edi.
