Ukraina prezidenti Petro Poroşenko Türkiye prezidenti Recep Tayyip Erdoğannen telefonda yapqan subeti esnasında onı «Ukraina topraq bütünligi ve qırımtatarlarnıñ aq-uquqını qorçalavda öz pozitsiyasına sadıq qalğanı içün» minnetdarlıq bildirdi.
Ukraina prezidentiniñ matbuat hızmeti haber etkenine köre, telefon konuşması mayısnıñ 24-nde keçti, eki devletniñ liderleri «eki tarafnen halqara kün tertibindeki aktual meseleler boyunca fikir alış-verişi yapqanlar».
«Taraflar Ukraina ve Türkiye arasında serbest ticaret muqavelesiniñ tizilüvini tezleştirmek muim olğanını qayd etti. Aynı zamanda söz, energetika, aviatsiya ve mudafaa saalarında özara elverişli işbirlikni keñleştirüv yolları aqqında laf etildi», – denilmekte haberde.
Aprel ayınıñ başında Ukraina prezidenti Petro Poroşenko İstanbulda Türkiye prezidenti Recep Tayyip Erdoğannen Rusiye apishanelerinde tutulğan ukrainalı siyasiy mabüslerniñ azat etilüvi meselesini muzakere etken edi.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
