Ukraina tış işleri nazirligi mayısnıñ 23-nde ilhaq etilgen Qırımda Qırımtatar Milliy Qurultayınıñ delegatı Asan Egiznen olıp keçken vaqiadan dolayı çorlana. Mayısnıñ 24-nde Twitter ağında bu aqta Ukraina tış işleri naziri Pavlo Klimkin yazmaqta.
«Qırımda insanlar ğayıp ola ve repressiyalarğa oğratıla. Bizler Qırımtatar Milliy Qurultayınıñ delegatı Asan Egizniñ alıp qaçırılaraq, zalımca köteklengenine narazılıq bildiremiz. Ğaliba da Kreml, böyle cinayetler cezalanmadan qalır dep belley», – dep yaza Klimkin.
Asan Egizniñ özü oğrağan işbu vaziyetni, ilhaq etilgen Qırımda Rusiye küç idaresiniñ hadimleri tarafından qırımtatarlarnıñ taqip etilüvine meyil berilgenini köstere dep izaatlay.
Mayısnıñ 23-nde Aqmescit rayonı Colman (Pionerskoye) köyünde uniforma kiygen insanlar Qırımtatar Milliy Qurultayınıñ delegatı Asan Egizni tutıp alğan ediler. Qırımdaki Rusiye FSB idaresi Egizni tutıp alğanını inkâr etti. Daa soñra alıp qaçılğan şahıs köteklengen alda ormandan tapıldı.
Ukraina tış işleri nazirligi Asan Egizniñ ilhaq etilgen Qırımnıñ Aqmescit rayonında alıp qaçılğanını takbih etti.
Rusiye küç idaresi hadimleriniñ bu hususnen bağlı daa bir açıq izaatı yoq.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
