Link açıqlığı

Saatnıñ esas haberi

İstanbulda Qırımda hırsızlanğan Ervin İbragimov içün dua oqudılar (+ fotosuret)


Ervin İbraimov içün dua oqula, İstanbul, 2018 senesi mayısnıñ 22-si
Ervin İbraimov içün dua oqula, İstanbul, 2018 senesi mayısnıñ 22-si

Mayısnıñ 22-nde İstanbul qırımtatar derneginde eki yıl evelsi Bağçasarayda hırsızlanğan Qırımtatarlarnıñ Bütündünya Kongressi icra şurasınıñ azası Ervin İbragimovnıñ sihhati ve tez vaqıtta qaytıp kelmesi içün dua oquldı.

Qırım.Aqiqat muhbiri haber etkenine köre, duadan soñ Ervin İbragimov adına iftar teşkil etildi.

«Bugünki iftarımız Ervinge adına berile. Onıñ biznen beraber olmağanına eki yıl oldı. Biz iç bir şeyge baqmadan onı beklemege devam etemiz. Yaqın zamanda bizim yanımızğa qaytacağına inanam. Rabbimiz tez vaqıtta Ervinni ana-babasına qaytarsın. Men onı balalığından berli tanıyım ve 2014 senesi Qırım ilhaq etilmegen olsa edi, biz Qırımğa barıp, Ervinniñ ana-babasınen beraber onı nişanlaycaq olğan edik. Lâkin.. bu ömürdir... Onıñ qaytacağına inanamız. Rusiye de Qırımnı terk eter. İşte, o zaman biz böyle iftarlarnı Bağçasarayda, Qırımda ötkerermiz», – dedi İstanbul qırımtatar derneginiñ reberi Celâl İçten.

​Tedbirniñ soñunda musafirlerge Ervin İbragimov aqqında video numayış etildi.

Dünya qırımtatar kongressi icra şurasınıñ azası Ervin İbragimov 2016 senesi mayıs ayında Bağçasarayda belgisiz insanlar tarafından hırsızlandı. Video nezaret kamerası Rusiye yol inspektorları urbasındaki eki kişi İbragimovnıñ maşinasını toqtatıp, onı mikroavtobusqa çekip kirsetkenini qayd ete.

Qırım uquqimaye gruppası bu hızrsızlıqqa rusiyeli akimiyet ya da paramillitar gruppalarnıñ alâqası bar olğanını iddia ete.

Qırımdaki Rusiye Taqiqat komitetiniñ Rusiye idaresi hırsızlıq boyunca cinayet işi asqan olsa da, ale bu küngece Ervin İbraimov ne yerde olğanına dair malümat yoqtır.

XS
SM
MD
LG