Link açıqlığı

Saatnıñ esas haberi

İstanbulda keçken mitingte qırımtatarlarnıñ sürgüni ve Qırımnıñ Rusiye tarafından ilhaq etilgeni takbih etildi (+fotosuret)


İstanbulda qırımtatarlarnıñ sürgün qurbanları hatırasına bağışlanğan miting. 2018 senesi mayısnıñ 19
İstanbulda qırımtatarlarnıñ sürgün qurbanları hatırasına bağışlanğan miting. 2018 senesi mayısnıñ 19

Türkiyeniñ İstanbul şeerinde keçken qırımtatar halqı sürgüniñ qurbanları hatırasına bağışlanğan dua-mitinginde, sovet akimiyetiniñ qırımtatarlarğa nisbeten yapqan ve 2014 senesi Qırımnıñ Rusiye tarafından ilhaq etilgenini takbih etken qarar oquldı. Bu aqta Qırım.Aqiqat muhbiri haber ete.

Tedbir İstanbul qırımtatar dernegi ile Çatalca qırımtatar dernegi tarafından teşkil etildi.

Tedbirde Ukraina İstanbul Baş konsullığının temsilcileri, Türkiye devletiniñ temsilcileri, Türkiye siyasiy firqalarınıñ temsilcileri, qırımtatar cemiyetleriniñ yolbaşçıları ve Türkiye Cumhuriyeti vatandaşlarınen beraber Qırımnı terk etmege mecbur qalğan Ukraina vatandaşı olğan qırımtatarlar iştirak etti.

Tedbir 1944 senesi sürgün etilgen qırımtatarlarnıñ sürgün qurbanları abidesiniñ yanında ötkerildi. Ananege binaen tedbir sükünet daqqası ve Türkiye em de qırımtatar gimnlerinen başlandı. Bundan soñ, yerli caminiñ imamı 1944 senesiniñ sürgün qurbanlarına bağışlap dua oqudı. Duadan soñ abidege gülçemberler qoyuldı.

Miting devamında Türkiye akimiyeti, Ukraina Baş Konsullığı temsilcileri ve qırımtatar cemiyetleriniñ reberleri çıqış yaptı.

Türkiyeniñ çoq sayıda olğan qırımtatar diasporası bütün dünyada olğanı kibi, er yıl qırımtatarlarnıñ sürgünine bağişlanğan miting, rekviyem, tedbir ve dualar keçire. İstanbulda ve onıñ civarında pek çoq qırımtatarlar yaşay.

Mayısnıñ 18-nde Ukrainada ve dünyada 1944 senesi Qırımdan qırımtatar halqı sürgüniniñ qurbanları añıla. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.

Ukraina Yuqarı Radasınıñ qararına binaen mayısnıñ 18-zi qırımtatar halqı sürgüniniñ qurbanlarını añma Künü olaraq ilân etilgen edi.

XS
SM
MD
LG