Canadanıñ büyük şeerlerinden bir olğan Toronto şeeriniñ meriyası 1944 senesi Qırımdan sürgün etilgen qırımtatarlarnıñ qurbanlarını añma ve ilhaq etilgen Qırımdaki qırımtatarlarnen birdemlik munasebetinen qırımtatar bayrağını köterdi.
Tedbirde qırımtatar halqınıñ lideri Mustafa Cemilev ve sabıq siyasiy mabüs, Milliy Meclis reisiniñ muavini Ahtem Çiygoz iştirak ettiler.
Tedbir ukrainalı diaspora yardımınen Canadalı qırımtatar cemiyeti tarafından teşkil etilde dep haber etile Çiygoznıñ Facebook saifesinde.
Qırımtatar cemaat erbapları Canadağa Qırımda devam etken etnik taqipler ve siyasiy repressiyalarnen bağlı malümatnen bardılar.
Ukrainanıñ Canada elçihanesi, planlaştırılğan tedbir Canadada qırımtatarlarnıñ sürgünini qayd etüv ananesini devam ettirgeni qayd etildi. 2016 senesi aynı künü qırımtatar bayrağı Ontario parlamentiniñ binası ogünde, 2017 senesi ise – Canadanıñ paytahtı Ottawa meriyası ögünde köterilgen edi.
Mayısnıñ 18-nde Ukrainada ve dünyada 1944 senesi Qırımdan qırımtatar halqı sürgüniñ qurbanlarını añıla. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.
Ukraina Yuqarı Radasınıñ qararına binaen mayısnıñ 18-zi qırımtatar halqı sürgüniniñ qurbanlarını añma Künü olaraq ilân etilgen edi.
Rusiye ilhaq etken Qırımda, resmiy soylârından ğayrı diger matem tedbirleri keçirmek yasaq. Keçirmege teşebbüs etkenler cezalandırıla.
