Canada ükümeti Qırımda insan aqları bozulğanından raatsız ve yarımadada yaşağan qırımtatarlarğa er taraflama yardım etmege devam ettirmek niyetinde. Bu aqta Canada TİNniñ reberi Chrystia Freelandnıñ qırımtatar halqı sürgüniniñ qurbanlarını añma yıllığı munasebetinen yapqan beyanatında söz yürsetilmekte.
«Bizler, Rusiye işğali altında bulunğan Qırım yarımadasında insan aqları fenalaşqanından raatsızlıq duyamız. Canada, Qırımda konkret yardım ve insan aqlarını qorçalama adına bir yollar tapmaq maqsadınen qırımtatar cemaatçılığınen işbirlik yapmağa devam etecek», – denilmekte haberde.
Freeland ayrıca Moskvanıñ Rusiye topraqlarında ve ilhaq etilgen yarımadada yasaqlanğan qırımtatar halqı Milliy Meclisiniñ aqlarını tiklenmege çağırdı.
Mayısnıñ 17-nde aqşam Aqmescit rayonınıñ qırımtatarlar kütleviy yaşağan Aq-Meçit Camide qırımtatar halqınıñ sürgün qurbanlarını añma Kününe bağışlanğan – «Qalbiñde ateş yaq» - aktsiyası ötkergen qırımlılar tutulıp alınğan edi. Tutulğan ve arasında çağına yetmegen balalar olğan yigirmige yaqın insan beş dane politsiya maşnasınen Aqmescit rayon politsiya idarelerine dağıtıldı.
Daa soñra tutulğan şahıslarnıñ bazılarından izaatnameler, parmaq izleri ve DNK nümüneleri alınğan soñ qoyıp yiberildi.
Qırımdan qırımtatar halqı sürgüniñ qurbanlarını añma künü er yıl mayısnıñ 18-nde qayd etile. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.
