Mayısnıñ 19 cumaertesi künü, İstanbul civarındaki Çatalca köyünde qırımtatar dernekleri qırımtatar halqı sürgüniniñ qurbanlarını añdı.
Tedbirde qırımtatar kültür ve yardımlaşma Dernegi İstanbul şubesiniñ yolbaşçısı Celâl İçten çıqış yaptı. Ondan ğayrı Ukrainanıñ İstanbuldaki Baş konsullığınıñ konsulı Alim Ametov da sözge çıqtı.
İştirakçiler qırımtatar sürgüniniñ 74 yıllığına bağışlanıp tiklengen abidege gülçemberler qoydılar.
Mayısnıñ 17-nde aqşam Aqmescit rayonınıñ qırımtatarlar kütleviy yaşağan Aq-Meçit Camide qırımtatar halqınıñ sürgün qurbanlarını añma Kününe bağışlanğan – «Qalbiñde ateş yaq» - aktsiyası ötkergen qırımlılar tutulıp alınğan edi. Tutulğan ve arasında çağına yetmegen balalar olğan yigirmige yaqın insan beş dane politsiya maşnasınen Aqmescit rayon politsiya idarelerine dağıtıldı.
Daa soñra tutulğan şahıslarnıñ bazılarından izaatnameler, parmaq izleri ve DNK nümüneleri alınğan soñ qoyıp yiberildi.
Qırımdan qırımtatar halqı sürgüniñ qurbanlarını añma künü er yıl mayısnıñ 18-nde qayd etile. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.
