Onlarnen insanlar qırımtatarlarnıñ Qırımdan sürgün etilgeniniñ 74 yıllığı munasebetinen Lvivniñ merkezinde ötkerilgen matem mitingine toplaştılar.
«74 yıl evelsi olıp keçken facianıñ aqibetlerini şimdi de is etmektemiz. Zira qırımtatar medeniyetiniñ bir çoq qatlamları artıq bir iz qaldırmadan ğayıp olıp ketti. Facia bugünde devam etmekte. Bunıñ neticesi olaraq, qırımtatar halqınıñ milliy-medeniy qıymetleri mahv etildi. Bugün de-bugün bizni bütün dünya eşitkeni pek muim», – dep qayd etti miting vaqtında Lvivdeki «Qırım evi»niñ temsilcisi Halil Halilov.
Lviv sakinleri sükünet daqqasınen 1944 senesi 18 mayısta başlanğan sürgün qurbanlarını añdılar. Musulman cemyetiniñ reisi (imam) dua oqudı. Şevçenko eykeli ögündeki meydanda insanlar sarı-mavı ukrain ve qırımtatar bayraqlarını tuta ediler.
Mayısnıñ 18-nde Ukrainada ve dünyada 1944 senesi Qırımdan sürgün etlgen qırımtatar halqı sürgüniniñ qurbanlarını añıla. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.
Ukraina Yuqarı Radasınıñ qararına binaen mayısnıñ 18-zi qırımtatar halqı sürgüniniñ qurbanlarını añma Künü olaraq ilân etilgen edi.
