Mayısnıñ 18-nde Bağçasarayda 1944 senesi qırımtatarlar sürgüniniñ qurbanlarınen bağlı matem tedbirleri ötkerile. İnsanlar, 1944 senesi sürgün etilgen qırımtatarları yüklengen trenler yollanılğan demiryol vokzalı yanında toplanğanlar.
Vokzal binası üzerinde yerleştirilgen hatıra yazısı ögüne çiçekler qoyula. Aynı zamanda mında sürgün qurbanları añılaraq dua oquldı.
Bu ananeviy tedbir Bağçasarayda er yıl keçirile.
Bu yılki matem tedbirleri vokzal etfaındaki meydannı nezaret etken rusiyeli telükesizlik organlarınıñ hadimleriniñ taqibi altında keçti.
Keriçte demiryol vokzalına yaqın yerde yerleştirlgen «Merametsizlik ve zorbalıqqa qarşı» yazılı hatıra tahtasına sürgüniñ qurbanları añaraq çiçekler qoyuldı, bayraqlar endirildi.
Mayısnıñ 18-nde Ukrainada ve dünyada 1944 senesi Qırımdan sürgün etilgen qırımtatar halqı sürgüniñ qurbanları añıla. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.
Qırımnıñ çeşit şeerlerinde Qırımdan sürgün etilgen qırımtatar halqı sürgüniñ qurbanları añma matem tedbirleri ötkerile.
Ukraina Yuqarı Radasınıñ qararına binaen mayısnıñ 18-zi qırımtatar halqı sürgüniniñ qurbanlarını añma Künü olaraq ilân etilgen edi.
