Aqmescitte 1944 senesi qırımtatarlarnıñ sürgüniniñ qurbanları añılaraq dua ötkerile. Tedbirge ellerinde milliy bayraq, şeritler, köksünde matem timsalleri olğan 100-ge yaqın insan toplanğan, dep haber ete Qırım.Aqiqat muhbiri.
Faaller, hatıra abidesi ögünde dua oquyaraq, çiçek qoya ve kenarğa çekilgen soñ, abide yanına başqa gruppa kele ve dua devam ete.
Tedbir Rusiye politsiyası ve OMON hadimleriniñ nezareti altında keçe. Qırım.Aqiqat muhbiri haber etkenine köre, tedbir keçirilgen yerge OMON hadimlerini ketirgen üçünci avtobus kelip çıqqan.
İnsanlar ellerinde milliy bayraqlarnı turalar, faal Server Karametov elinde – «Qırımtatar halqına azatlıq» dep yazılğan büyük milliy bayraq bar.
Mayısnıñ 18-nde Ukrainada ve dünyada 1944 senesi Qırımdan sürgün etilgen qırımtatar halqı sürgüniñ qurbanları añıla. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.
Ukraina Yuqarı Radasınıñ qararına binaen mayısnıñ 18-zi qırımtatar halqı sürgüniniñ qurbanlarını añma Künü olaraq ilân etilgen edi.
