Mayısnıñ 18-nde Aqmescitte bir kün ögüne ötkerilgen qırımtatar halqınıñ sürgün Kününe bağışlanğan «Qalbiñde ateş yaq» aktsiyasınıñ iştirakçisi mahkeme etilecek.
Qırım.Aqiqat muhbiri haber etkenine köre, oturışuv saba saat 9-da Kreml nezareti altındaki Merkeziy rayon mahkemesinde başlamaq kerek eken.
Tutulıp, mayısnıñ 17-nde keç vaqıtta Merkeziy ROVDğa ketirilgen şahıs, politsiya hadiminiñ qanuniy buyruğına boysunmamaqta qabaatlana (Rusiye Memuriy uquq Kodeksiniñ 19.3 maddesi). Tutulğan şahısnıñ adı belli degil ve izaatları da yoq.
Bir kün evel Aqmescit rayonınıñ qırımtatarlar kütleviy yaşağan Aq-Meçit Camide – «Qalbiñde ateş yaq» – aktsiyası ötkergen qırımlılar tutulıp alınğan edi. Tutulğan şahıslar beş dane politsiya maşnasınen Aqmescit rayon politsiya idarelerine dağıtıldı.
Tutulğan şahıslar daa soñra Rusiye politsiya bölüklerinden çıqarılıp yiberildi. Rusiye telükesizlik küçleriniñ bu hususnen bağlı izaatları yoq.
Qırımdan qırımtatar halqınıñ sürgün etilüv künü er yıl mayısnıñ 18-nde qayd etile. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 200 biñden ziyade insan sürgün etilgen.
