Aqmescit rayonınıñ qırımtatarlar kütleviy yaşağan yeri Aq-Meçit Camide – qırımtatar halqınıñ sürgün Kününe bağışlanğan «Qalbiñde ateş yaq» aktsiyası ötkergen qırımlılar tutulıp alındı. Qırım.Aqiqat muhbiri haber etkenine köre, 20-den ziyade insan tutulğan.
Tutulğan şahıslar beş dane politsiya maşnasınen Aqmescit rayon politsiya idarelerine dağıtılğan. Olardan yazılı şaatlıq alına ve daktiloskopiya ötkerile.
Edem Semedlâyevniñ sözlerine köre, olarnı «izinsiz miting keçirgeninde» qabaatlamaq niyetindedirler. Tutulğanlar arasında çağına yetmegen qırımlılar da bar.
«Yaş balalar añmaq istedi, çoqusı da çağına yetmegen balalar. İlk başta 15 kişilik kiçkene bir tedbir 9-ncı soqaqta keçti. Ekseriyet 5-nci – Amet-Han Sultan soqağında qaldı, yaşları 13-25 arası. Başında bir dane PPS maşnası ve adiy vatandaş urbası kiygen birisi keldi. Maşnalarnıñ nomerlerinen insanlarnı videoğa çekip başladılar. İnsanlar bunı begenmedi, büyükler arasında sözlü çatışma çıqtı. Olar konuşqan soñ, dağılıp başladılar. Tedbir bitti. Bizler qave içmege kettik, qaytqanımızda – artıq 5 taqım politsiya hadimi ve avtozak tura edi», – dep ikâye ete şaatlardan biri.
Qırım.Aqiqat olıp keçken vaqialarnı taqip etmege devam ete. Şimdilik Rusiye telükesizlik küçleriniñ bu hususnen bağlı izaatları yoq.
Qırımdan qırımtatar halqınıñ sürgün etilüv künü er yıl mayısnıñ 18-nde qayd etile. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.
İlhaqtan soñ Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
