Ukraina tış işleri naziri Pavlo Klimkin, qırımtatarlarnıñ Qırımda Rusiye saylâvlarını boykot etkeni halqara arenada Kyivniñ ortaqları içün «küçlü bir signal» olğanı aqqında söyledi. Bu aqta o ATR efirinde söz yürsetti.
«Qırımtatarlar Qırımda ötkerilgen Rusiye prezidenti saylâvlarında bili-bile qatnaşmadılar. Bu vatandaşlıq iradesi ve cesürliginden ğayrı, bizim ortaqlarımız içün küçlü bir signal sayıla», – dep bildire Ukraina TİNi Twitterde Klimkinniñ sözlerini.
Martnıñ 19-nda Qırımtatar Milliy Meclisiniñ reisi Refat Çubarov yarımadada yaşağan qırımtatarlarnıñ 90%den ziyadesi Rusiye prezidentiniñ saylâvlrını «asla nazar-itibarğa almadı» dep aytqan edi.
Martnıñ 18-nde Rusiyede ve o ilhaq etken Qırımda Rusiye prezidentiniñ saylâvları keçti. Resmiy Kyiv, bir sıra halqara teşkilâtlar ve bir çoq devletler yarımadada ötkerilgen saylâvlarnı tanımay.
Martniñ 19-nda Ukraina prezidenti Petro Poroşenko «cuziy» ve Rusiye ilhaq etken Qırımda keçirgen saylâvlar «iç bir uquqiy netice bermeycek» dep ayttı.
Mayısnıñ 14-nde AB Şurası Qırımda ötkerilgen Rusiye saylâvarındandan dolayı yarımadada Rusiye nezareti altındaki saylâv komissiyasınıñ al-azırdakidört azası ve Aqyar saylâv komissiyasınıñ sabıq yolbaşçısına qarşı sanktsiyalar kirsetti.
