Resul Velilâyev – qırımtatartlar arasında eñ çoq urmet etilgen insandır. Bu qabartmaq sayılmay. O, qırımtatar iş adamları arasında az sayıda olğan kerçek manada bir hayriyeci, yani medeniyet ve sanat inkişafında göñülli olaraq qarşılıqsız yardım etken bir insandır.
Resul Velilâyev – qırımtatarlar arasında eñ çoq urmet etilgen insandır
2007 senesinden itibaren onıñ, meşur qırımtatar türkşınas alimi Bekir Çoban-zade adına tesis etken mükâfatı bar. Men meseleni qabartmadan bunıñ – gumanitar saada çalışqan alimlerge berilgen, olarnı maneviy ceetten rağbetlendirmekten ğayrı, olarğa maddiy mükâfat alma aqqı bergen yekâne bir mükâfat sayıla. Bu, Velilâyev başlatqan pek müim iştir, çünki sır degildir ki, mütehassıs olaraq öz halqınıñ tarihı ve medeniyetiniñ tedqiqatınen oğraşqan pek az olğan qırımtatarlar, tuvğan Qırımında esasen yoqsullıq içinde yaşap, uzun yıllar devamında birer-birer tola qoyaraq, evlerini qurmağa areket eteler. 2009 senesi bu mükâfatnı men de almağa nail olğan edim – ilmiy tarihiy işim içün alınğan ilk ve soñki mükâfatım sayıla.
Mükâfatqa boşuna Çoban-zade adı berilmedi. Bu insan Qarasuvbazarnı bütün dünyağa tanıttı, faqat o – adiy bir çobannıñ oğlu –istidatlı bir genç olaraq ayaqqa turayatqan maalde, XX asırnıñ başında şeerniñ golovası olğan Abdureşid Mediyev hayriye yaradımı yapmağan olsa edi, o devirde ömürbillâ böyle bir zirvege yükselip olamaz edi.
Resul Velilâyev asla aqılğa yatmaycaq bu derece mantıqsız ve absurd qabaatlav boyunca tevqif etildi
İşte bu insan yani Resul Velilâyev – bugün de-bugün – oña ait olğan tükânlarda künü keçken mallarnıñ tututlğanı sebebinden, asla aqılğa yatmaycaq bu derece mantıqsız ve absurd qabaatlav boyunca tevqif etelerek, FSBniñ apishanesi olğan Lefortovada tutula.
Atta 1937 senesi tevqif etilip qurşunğa tizlgen Bekir Çoban-zadege nisbeten bile daa da yahşı qabaatlav tapılğan edi – o, milletçi Milliy Firqa lideri olaraq mahküm etilgen edi (albuki, o vaqıtlarda firqanıñ ortadan coytulğanına 15 yıl olğanına baqmadan)...
Bu yıl mayıs ayınıñ soñunda bütün dünya ulu alim Bekir Çoban-zadeniñ 135-yıllığını qayd etecek. Onıñ adına bir fond tesis etken Resul Velilâyev o vaqıtqace azat etilir dep tüşünmek doğru olur.
Bu er bir noqta-i nazardan doğru olur, çünki bir taraftan - onıñ qabaatlı olmağanı aşikâr, diger taraftan da, al-azırda 1937-ncı senesi degil de, 2018 senesidir.
Aprelniñ 26-si saba telikesizlik hızmetiniñ hadimleri Qarasuvbazarda, qırımtatar iş adamı ve cemaat erbabı olğan Resul Velilâyevke bağlı ev ve iş obyektlerinde kütleviy operatsiya ötkerdi. O, qomşu Rusiyeniñ Moskova şeerinde yerleşken «Lefortovo» SİZOsına yollandı. Rusiye Taqiqat komiteti iş adamına ait olğan «KrımOpt» distribütorlıq şirketine qarşı cinayet işi açtı. Rusiye Cinayet kodeksiniñ 238 maddesine istinaden Velilâyev – telükesizlik talaplarına uyğun olmağan mallarnıñ istisal etilüvi, saqlanuvı ve satıluvında qabaatlana.
Bloglar» rubrikasında ifade etilgen fikirler muelliflerniñ öz fikirlerini aks etip, muarririyetniñ fikrini aks etmey bileler
Maqaleniñ aslı – Gülnara Bekirovanıñ Facebook saifesinde derc etilgendir.