Mahsus Qırım.Aqiqat içün
Kreml tarafından tayin etilgen Sergey Aksönov Qırım sakinlerine Ukrainanıñ qıta qısmına memuriy sıñır üzerinden qatnamamaqnı tevsiye eterek, Ukrainanı, qanunlar asla işlemegen «pirat devleti» dep adlandırdı. Ancaq Aksönovnıñ mantığı, işğalci ükümet yolbaşçısınıñ er zamanki halq ögündeki beyanatları kibi, ters çevirilgen manada aytıla. Çünki Aksönov Ukraina qanunlarını pek yahşı bilgen ve añlağanını kösterecek ola. Lâkin bu arada cinayetdeşlerine olarnı nasıl aylânıp keçmek mumkün olacağını tevsiye ete.
Aksönovnıñ beyanatı Qırım sakinleriniñ epsine degil de, Ukraina qanunlarını bozğanlarını tahmin etken – hususan, kvazidevlet strukturaları hadimlerine yöneltilmekte. Ve Aksönov olarğa ür Ukraina territoriyasına barmañız demey. Yoq, o yalıñız memuriy sıñırdan qaçınıñız ve devlet sıñırı üzerinden qatnañız dey. O yerde qanun bozğanlarnı tanımaq qıyınca olur dep ümüt ete.
Bu bir pirat mantığı degil ise – o zaman ne olabilir? Eger insan özüni devlet hadimi dep saysa, halq ögünde – deyik ki, öz devleti dep esaplamağan devletni nasıl aldatılacağına dair tevsiyeler berse -bu insan pirat olmay da, kim olacaq? Em de bu uquqiy nigilizmni, iç bir devletni saymamaq, ürmet etmemekten ğayrı ne şekilde izah etmek mumkün?
Devlet olar içün– deger degil de, zenginleşme vastası sayıla. Olar hainlik yapmağa aqqı bar dep sayalar
Bir qaç künlük işğal zarfında Rusiye vatanperverlerine çevirilgen Aksönov ve Qırım ükümetiniñ temsilcileri, dersiñ, devletni bir aşlav dep köreler. Qırımda Ukraina suvereniteti olğanda, olar yarımadanıñ «muqaddesligi» aqqında tüşünmege bile istemey ediler, onıñ Rusiye qoşulması aqqında bir söz aytmay ediler – yani, kerçek manada «Rusiye vatanperverleri» yapmaq kerek olğan iç bir şey yapmay ediler. «Vatanperverlikleri» ise, fursat peyda olğanında degil de, emir kelgen maalde türtip çıqtı.Rusiye işğali bitkenden soñ, eminim ki, halq ögünde özüni kirletip yetiştiralmağan soylârı Ukraina vatanperverligi, ukrain tili ve qanunlarını bilgeniniñ alâ derecesini kösterir – aşlav «vatanperverleriniñ» taqdiri böyledir, işte.
Hususan bu sebepten olar bütün samimiyetinen bugün Qırımdaki «devlet struktuıralarına» kirip çalışmaq, yarın ise – ukrain biometrik pasportları almaq mumkün olğanından eminler. Bugün – Qırım parlamentinde yarımadanıñ Rusiyege «bağlanması» içün rey bere, yarın ise – Ukrainanıñ qıta qısmına tibbiy yardım almağa baralar. Bugün – Rusiye saylâv spektaklinde Putin ve diger iştirakçiler içün teşviqat yapıp, yarın – memuriy sıñırda asla çorlanmadan ukrain pasportını köstereler. Devlet olar içün – deger degil de, zenginleşüv vastası sayıla. Olar hainlik yapmağa aqqı bar dep sayalar.
Çünki Qırımda hainlik yapmaq – oñaytlı şeydir.
«Fikir» rubrikasında ifadelengen fikir-tüşünceler müelliflerniñ noqtai nazarını aks ettirip, muarririyetniñ baqışlarınen bir olmaması mümkün