Keçenlerde Ukraina tasil ve ilim nazirligi, devlet sımarışınıñ kölemini tayin etp, malümatnı saytta derc etti. Bu malümat, ilhaq etilgen Qırımdan «Qırım – Ukraina» Tasil merkezleri yardımınen Ukrainanıñ aliy oquv yurtlarına oqumağa kirmekni planlaştırğan kelecekteki abituryentleri içün pek muim. Çünki işğal etilgen topraqlarda yaşamağan Ukraina mezunları eñ çoq dört zenaat boyunca devlet ve bölge sımarışı boyunca ayırılğan yerlerge yedi qadar ariza bermek mümkün olsa, ilhaq etilgen Qırımdan kelgen mezunlarda yalıñız bir imkân bar.
Ondan ğayrı, vaqtınca ilhaq etilgen Qırımdan oqumağa kire bilecek yerlerniñ sayısı devlet sımarışındaki yerlerniñ umumiy sayısından 20%-i ile sıñırlanğan (2018 senesinde Ukrainanıñ aliy tasil muessiselerine qabul etüv şartları boyunca kvota – 2). Bunıñnen birlikte, derc etilgen malümat «Qırım – Ukraina» Tasil merkezleri çalışacaq aliy oquv yurtları aqqında bilmege imkân berecek.
Taqdim etilgen malümat deñişmek mümkün, çünki «Qırım – Ukraina» Tasil merkezleriniñ çalışıp başlağanlarına qadar daa vaqıt bar. Ondan ğayrı bugünki künde, bu cedvelge Tavriya milliy universiteti ne sebepten kirsetilmedi, belli degil, lâkin büyük ihtimal ile bu, tehnikiy hatadır, ve tezden bu malümat da yayınlanacaq. İlk malümatqa köre, «Qırım – Ukraina» Tasil merkezleri 2018 senesi iyün 4-ten çalışıp başlaycaqlar.