Link açıqlığı

Saatnıñ esas haberi

Kremlniñ nezaretinde çalışqan Qırım Yuqarı Mahkemesinde Ukraina vatandaşı Yevgeniy Panovğa qarşı açılğan cinaiy davanıñ esası boyunca ilk mahkeme oturışı ötkerildi. Panov Qırımda diversiyalrnı azırlağanında ve patlayıcı aletlerni qanunsız surette ketirip saqlağanında qabaatlana.

Qırım.Aqiqat muhbiri bildire ki, qapalı surette ötkerilgen mahkeme oturışında Panovğa qarşı qabaatlayıcı üküm oqulğan.

Mahkümniñ advokatı Dmitriy Dinzeniñ bildirgenine köre, taqiqatçınıñ hulâsaları – fantaziya olğanını beyan etken Panov qabaatını nevbetteki sefer inkâr etken.

Dinze qayd etti ki, advokatqa ve mahkümge berilgen esnas materialları arasında «gizli cılt» peyda olğan. Bu, onıñ sözlerine köre, taqiqatçı ve Rusiye FSB idaresiniñ reberi «devlet sırınıñ faş etilmesine izin bergenlerini» köstere.

Bu munasebetnen advokat mahkeme ögünde «FSB hadimleri tarafından ağır cinayet işlenilgenini» beyan etken. Zanınca, olar devlet sırını faş etkenleri içün mesuliyetke celp etilmek kerekler.

Aprelnin 16-nda mahkeme «ukrain diversantı» Panov davasınıñ asılını baqıp başlağan.

2016 senesi avgust ayında Rusiye Federal havfsızlıq hızmeti (FSB) ilhaq etilgen Qırımda «ukrain diversantlarını» yaqalağan, olar sanki yarımadada terakt kerçekleştirmege azırlanğan ekenler. Tutılğanlar bazı vaqıt devamında Moskvanıñ Lefortovo apishenesinde tutılıp, soñra Qırımğa ketirilgen edi.

Rusiye mahsus hızmetleri, tevqif etilgen Yevgeniy Panov ve Andrey Zahtey «diversantlar gruppasına» kirgen edi, dep bildirdiler, ve olar sanki yarımadanıñ turistik ve içtimaiy infraterkip obyektlerinde terakt kerçekleştirmege planlaştırğan ekenler.

Ukraina akimiyeti rusiyelilerniñ ukrainlerge atqan qabaatlavlarını red ete ve bunı mahsus hızmetlerniñ provokatsiyası olaraq tanıy.

Bundan evel, Zahtey taqiqat ile mahkemeden evel añlaşma imzalağan. Añlaşmanıñ şartlarından biri – Zahteyniñ kelişken advokatından vazgeçmesi edi.

Fevral ayında o 6 yıl ve 6 ayğa sert rejimli cezahanede apis muddetine ve 220 biñ ruble (tahminen 105 biñ grivna) miqdarında para cezasına mahküm etilgen edi.

Yevgeniy Panov qabaatını inkâr etti ve taqiqat ile añlaşmasını red etti.

XS
SM
MD
LG