Link açıqlığı

Saatnıñ esas haberi

Ukrainanıñ Milliy telükesizlik ve mudafaa şurasınıñ kâtibi Oleksandr Turçinov, Kyivniñ başta Donbassnıñ işğal etilgen qısmını ve ondan soñ Rusiye tarafından ilhaq etilgen Qırımnı öz kontroli altında qaytaracağından emin. Bunı Turçinov «Gordon» neşiri içün bergen intervyüde dedi.

«Zemaneviy dünya şaraitinde er kes öz küçüne işanmaq kerek. Zayıflarnıñ esamesini oqumaylar, olarğa aqıl ögrete, olarnı aşalay ve qullanalar! Yalıñız küçlü Ukraina özüni ürmet etmege ve öz miliy menfaatlarını esapqa almağa mecbur ete bile! Biz böyle Ukrainanı qurmaq kerekmiz… İşğal etilgen territoriyalarnı qaytaruv – devletimiz içün eñ esas vazifedir. Eminim ki, başta bütün Donbass, ve ondan soñ Qırım qaytarılacaqlar», – dedi Turçinov.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

Donbasstaki silâlı çatışma, 2014 senesinde Qırım Rusiye tarafından ilhaq etilgen soñ başlap, ale daa devam ete. Ukraina ve Ğarp Rusiyeni separatistlerge silâlı şekilde qol tutqanında qabaatlaylar. Kreml bu qabaatlavlarnı inkâr ete, ve Donbassta yalıñız Rusiyeden kelgen «göñülliler» bulunmaq mumkünler, dey. BMTniñ malümatına köre, çatışma esnasında 10 biñden ziyade kişi elâk oldı.

XS
SM
MD
LG